ड्रेवर की सूझबूझ से बची आठ स्कूल्या नौन्याळू जान, बड़ू खतरा टळी ग्यायी

धुमाकोटः काशीपुर बुआखाल हाईवे रस्ता मा डूंगरी बजार समणी स्कूली बच्चों से भरी एक बोलेरो गाड़ी मा अचाणचक आग लगी ग्यायी। गाड़ी ड्रेवर विजेन्द्र की सूझबूझ से आठ स्कूल्या नौन्याळू जान बची ग्यायी। कुच्छ मिनट देर हूंद त बड़ू हादसा ह्वे सकदू छ्यायी।
थाना धुमाकोट प्रभारी प्रदीप उनियाल न बतै कि छंचर (शनिवार) दिन सुबेर गॉव डुंगरी मा एक बोलेरो गाड़ी पैराडाईज पब्लिक स्कूल अदालीखाल क आठ स्कूल्या नौन्याळ तै लेकन स्कूल जाणा छेयी। तबरी करीब साढे नौ बजे डूंगरी बजार से करी 100 मीट अगन्या बैंड क समणी बोलेरो क इंजन बटी धुआं निकळण शुरू ह्वे ग्यायी। गाड़ी ड्रेवर पतगॉव धूमाकोट रैवासी विजेन्द्र सिंह न अपर सूझबूझ क परिचय देकन इकदम गाड़ी पर ब्रेक मारी द्यायी अर सड़क किनर खड़ू कर द्यायी। गाड़ी रूकदी नौन्याळू न फाळ मारी कन सड़क पर भागी गेन। कुच्छ मिनट बाद गाड़ी पूरी तरह से आग की चपेट मा ऐ ग्यायी अर धूधू करी कन फुके ग्यायी। गाड़ी पर आग लगण की खबर सूणी कन डूगंरी बजार दुकानदार अर नौन्याळू क अभिभावकू गाड़ी तरफ दौड़ीन, लेकिन तबरी तकन बच्चा राजी खुशी गाड़ी बटी भैर ऐ गे छ्यायी। परिजनू न घटना की खबर पुलिस तै द्यायी। पुलिस मदद से आग तै बुझये ग्यायी। आग लगण कारण शार्ट सर्किट बतयाणा च।

Loading...

Leave a Reply

Your email address will not be published. Required fields are marked *