पौड़ी गढ़वाल : मुख्यमंत्री न 64 करोड़ की भैरवगढ़ी पंपिंग पेयजल योजना करी लोकार्पण , 75 गांव अर तोक तै मिलल पाणी

पौड़ी गढ़वाल : मुख्यमंत्री न 64 करोड़ की भैरवगढ़ी पंपिंग पेयजल योजना करी लोकार्पण , 75 गांव अर तोक तै मिलल पाणी

पौड़ी गढ़वाल : मुख्यमंत्री त्रिवेंद्र सिंह रावत न रविवार कुणी पौड़ी जिला जयहरीखाल ब्लॉक मा 64 करोड़ 86 लाख रूपये की भैरवगढ़ी ग्राम समूह पंपिंग पेयजल योजना अर 1 करोड़ 63 लाख रूपये लागत से बणयूँ विकासखंड कार्यालय भवन जयहरीखाल लोकार्पण करी। ये मौका पर मुख्यमंत्री न ब्वाल कि यी योजना से इलक 75 गांव अर तोक तै पाणी मिलल। उन ब्वाल कि सरकार मा आंद सार यी योजना पर तेजी से काम शुरू करे ग्यायी। 2006 मा यी योजना शिलान्यास तत्कालीन सरकार न करी छ्यायी लेकिन पैसो कमी कारण योजना एथर नि बढ़ी पाई।ब्वाल कि अगर यी हाल रैंद त यी योजना 2035 मा पूरी हूंद। लेकिन हमन यी तै प्राथमिकता तौर पर ल्याई। ब्वाल की आज देश सबसे बडू झूला पुल टिहरी मा डोबरा चांठी बणी कन तैयार ह्वे ग्यायी उन लोगू से भी आह्वान करी कि उ अपर अधिकारों तै समझो अर जनप्रतिनिधियों से जख सवाल कन ह्वाव उ भी जरूर कर्या।

मुख्यमंत्री न ब्वाल कि सरकारी नौकरी सीमित ह्वे करदी ये बाबत सरकार नियमित भर्तियों दगड़ी स्वरोजगार मौका भी दीणा। युवाओं तै चियाद कि उ मुख्यमंत्री स्वरोजगार योजना समेत मुख्यमंत्री सोलर स्वरोजगार योजना लाभ उठाव। सरकार न सोलर ऊर्जा योजना मा दस हजार लोगू तै रोजगार द्याण लक्ष्य रखयूं। चीड़ पत्तियों तै बड़ी फैक्टरियों मा बायलर मा इस्तेमाल करे जांद । ये बाबत अमेरिका बिटी बड़ी मशीन मंगयाणा छ। पिरूल प्लांट मा चीड़ पत्तियों तै खरीदणा छन। ये से 40 हजार लोगू तै रोजगार मिलल। ये दौरान उन रेवा पम्पिंग योजना समेत रामी नदी, सिमलसेरा मा, मींदाल नदी पर बाढ़ सुरक्षा कार्यों तै स्वीकृति दीण घोषणा करी। ये दगड़ी नैनीडांडा मा विद्युत खंड खुलण की भी घोषणा करि। येक अलावा कंडोलिया मा गुलदार रेस्क्यू सेन्टर तै मंजूरी द्याय।

    ये मौक पर लैंसडौन क विधायक महंत दिलीप रावत, जिलाध्यक्ष संपत रावत, अतर सिंह असवाल, ब्लॉक प्रमुख महेंद्र राणा, दीपक भंडारी, FRI क निदेशक अरुण सिंह रावत, विशेष सचिव पराग मधुकर धाते, जिलाधिकारी धीरज गर्ब्याल , मण्डल अध्यक्ष द्वारीखाल अर्जुन कण्डारी विधायक प्रतिनिधि गौरव सुयाल कनिष्ठ उपप्रमुख रविन्द्र रावत,नरेश नैथानी,परमीत सिंह,मनोज बलूनी,सांसद प्रतिनिधि मनोज रावत,अमन नैथानी आदि मौजूद रैन।

Loading...

Leave a Reply

Your email address will not be published. Required fields are marked *