बिग ब्रेकिग न्यूजः- तेज किड़कताळ दगड़ी स्कूल मा पड़ी आगाश बिजळी, 16 नौन्याळ अर 03 मास्टर समेत परिचारक झुलसी गेन

बागेश्वर जिला क जूनियर हाई स्कूल जेठाई मा अगास बिजळी पड़न से कत्ती बच्चा झुलसी गेन। अफरा तफरी मा ब्वे बुबों तै बुलैकन नौन्याळूं तै घऽर लखै देन। जाणकारी मिलण पर रंजना राजगुरू न डॉक्टरू की एक टीम गौं कुणी पैटै याल। बागेश्वर मा आज बौत बड़ू हादसा हूण से बची ग्यायी। शुकर मनाव कि नौन्याळ स्कूल भीतर कमरा मा ही बैठ्या छ्यायी। बतयाणा च कि बरखा दगड़ी जूनियर हाई स्कूल जेठाई क चौक मा अगाश बिजळी पड़ी, ये मा जूनियर हाई स्कूल जेठाई 16 बच्चा, तीन मास्टर अर परिचारक झुलसी गेन। ब्याळी बटी लग्यां झड़ कारण संचार सुविधा भी सही नी च। मास्टरू न अफरा तफरी मा सामान्य इलाज कना बाद अभिभावकूं तै बुलै कन स्क्ूल्यों तै घऽर लखे देन। आपदा प्रबन्धन क मुताबिक स्कूल क मास्टर न उं तै बतै कि अचाणचक बौत तेज बादळू गगड़ाट अर किड़कताळ पड़ी। यीं किड़कताळ कारण उंक ऑख अर कन्दूड़ू सुन्नपट्ट ह्वे गेन, जै कारण अफरा तफरी मची ग्यायी। अगाश बिजळी पड़न से स्कूल पैथर लग्यूं टावर तै भी नुकसान ह्वे ग्यायी। सब्बी नौन्याळ राजी खुशी छन।

Loading...

Leave a Reply

Your email address will not be published. Required fields are marked *