उत्तरकाशी मा एक बार फिर हैलीकाप्टर क्रैश हूण से बची, आकस्मिक लैंडिंग, पायलट ह्वेगे घैल

उत्तराखण्ड उत्तरकाशी मा आपदाग्रस्त आराकोट क्षेत्र गौं मा राहत सामग्री पौछाण दौरान शुक्रवार कुणी एक हैलीकाॅप्टर क्रैश हूंद हूंद बची। आराकोट बिटी चिवां गौं खातिर राहत सामग्री लेकन हैलीकाॅप्टर नगवाड़ा टिकोची नजीक नदी किनर आपात लैडिंग कराण पड़ी। ये हादसा मा पायलट कैप्टन सुशांत कुमार मुण्ड पर चोट लगण से घैल ह्वे ग्यायी, जबकि इंजीनीयर राजी खुशी छ।
बतै दिवा कि पिछल 21 अगस्त दिन आराकोट क्षेत्र मा आपदाग्रस्त मोल्डी गौं मा राहत सामान पौछाण दौरान हैरिटेज एविएशन कंपनी एक हैलीकाॅप्टर क्रैश ह्वे गे छ्यायी। ये हादसा मा पायलट समेत इंजीनीयर तीन लोगू मौत ह्वे गे छ्यायी। ये हादसा बाद क्षेत्र मा हैलीकाॅप्टर बिटी राहत अर बचाव कार्य कन बंद करी दे छ्यायी।
शुक्रवार दिन एक बार फिर आर्यन एविएशन कंपनी हैलीकाॅप्टर मदद से प्रभावित गौं मा रसद पौछाण काम शुरू करी। ये हैलीकाप्टर न आराकोट बिटी द्वी चक्कर लगै कन चिवां गौं राहत सामान पौछायी। तीसर चक्कर मा यी राहत सामान लेकन चिवां गौं खुणी उड़णू छ्यायी त दुफरा मा करीब सवा बारह बजे नगवाड़ा टिकोची समणी येक इमरजंसी लैडिंग कराण पड़ी।
बतयाणा छ कि नगवाड़ा समणी बगीचा बिटी सड़क तकन सेब पहुॅचाण खातिर लगी ट्राॅली तार समणी आण पर पायलट न तारों मा अलझण से बचण खातिर हैलीकाप्टर तै तळ करी कन नदी किनर उतारी द्यायी। यख भारी बोल्डरू पर हैलीकाॅप्टर उतरण से पायलट सुशांत कुमार जाना रैवासी जबलपुर मध्यप्रदेश मुण्ड पर आॅख समणी गंभीर चोट ऐ ग्यायी अर ल्वे बगण लगी ग्यायी। दगड़ मा अजीत सिंह इंजीनीयर राजी खुशी च। हैलीकाॅप्टर तै बौत नुकसान पौछी। अगल बगल गौं लोगून उबरी मौका पर पौछी कन घैल पायलट तै हैलीकाॅप्टर बिटी भैर निकाळी। खबर मिलण पर एसडीआरएफ रेस्कयू टीम भी मौका पर ऐ ग्यायी। घैल पायलट तै घुग्गा मै बैठेकन फिर एंबुलेंस मदद से सड़क रस्ता आराकोट पौंछायी। यख प्राथमिक उपचार बाद पायलट अर इंजीनीयर तै उत्तराखण्ड सरकार हैलीकाॅप्टर मदद से देहरादून भिजे ग्यायी। आपदा प्रभावित क्षेत्रौं तकन रसद दगड़ी ही व्यवस्था बहाल कन जरूरी सामान पौछाण कुणी हैलीकाॅप्टर इस्तेमाल करयाणा छ। हैलीकाॅप्टर इमरजैंसी लैडिंग करये ग्यायी। पायलट तै चोट ऐ ग्यायी। उंते प्राथमिक उपचार खातिर हैलीकाप्टर बिटी देहरादून भिजे ग्यायी। एसडीआरएफ टीम ये हादसा कारण पड़ताल कनी च।
डाॅ0 आशीष चैहान, जिलाधिकारी उत्तरकाशी।

Leave a Reply

Your email address will not be published. Required fields are marked *