मास्टरू तैनाती मॉग खातिर, सड़क पर उतरीन स्कूल्या नौन्याळ

उत्तराखण्ड मा शिक्षा व्यवस्था हालात इन छन कि स्कूल्यों तै अपर बोर्ड एक्जाम पढै छोड़ी कन मास्टरू नियुक्ति कना खातिर सड़क पर उतरण पड़ना। जै राज्य भविष्य सड़क पर नारा लगाणा ह्वाल वैक भविष्य क्या ह्वाल सोच सक्यांद। पोखड़ा प्रखण्ड राजकीय इण्टर कॉलेज सनकोलीखाळ मा सालौं बिटी आठ मास्टरू पद खाली हूण कारण से परेशान स्कूल्यों सब्र कन हिम्मत खतम सी ह्वे ग्यायी। उन मास्टरू तैनाती मॉग तै लेकन क्षेत्र मा स्कूल बिटी बीईओ कार्यालय तकन जूलूस निकाळी अर शिक्षा विभाग खिलाफ प्रर्दशन करी कन विद्यालय परिसर मा धरना द्यायी।

ब्याळी छंचर (शनिवार) खुणि राजकीय इंटर कॉलेज सनकोलीखाळ मा दर्जा नौ से लेकन 12 तकक नौन्याळौ न स्कूल परिसर मा कठ्ठी ह्व्ेन। उन हत्थू पर मास्टरू की मॉग खातिर लिख्यां पोस्टरौ दगड़ी विद्यालय चौक बिटी सड़क रस्ता ह्वे कन पोखड़ा खंड बीईओ कार्यालय तकन जूलूस निकाळी कन प्रदर्शन करी। बीईओ कार्यालय मा नी हूण पर उन धरना द्यायी अर वरिष्ठ लिपिक तै अपर ज्ञापन सौंपी। ये मौका पर विद्यार्थियूं न शिक्षा विभाग पर उंक भविष्य दगड़ी धोखा करणा बकै लगायी। उन ब्वाल कि पिछल द्वी साल मा इतिहास, राजनीतिशास़्त्र, अर्थशास्त्र, हिंदी, अंग्रेजी, विज्ञान अर संस्कृत मास्टरू पर खाली छन। जै कारण स्कूल मा पढण ह्वाळ 223 नौन्याळ भविष्य दावं पर लग्यूं। बोर्ड इम्तियान अब मुख समणी छन, इन मा बिना मास्टरू कारण उं तै बौत परेशनी उठाण पढणा छन। स्कूल्या नौन्याळू चंट चितवळ करी कि अगर जळदी मास्टर तैनात नी करे जंदन त ब्वे बुबों दगड़ी उ बीईओ कार्यालय मा आंदोलन कना खातिर मजूबर ह्वे जाल। ये मौका पर गीता नेगी, यामिनी गुसाईं, अंकिता रावत, अंजलि रावत, ममता रावत, साक्षी रावत, गीता कुमारी, साक्षी नेगी, एकता रावत, शिवानी रावत, सुमित गुसाईं, राहुल रावत, आशीष रावत, शुभम बहुखंडी, आयुष रावत, सागर जखमोला, अमन रावतयी सब्ब स्कूल्या नौनी नौन्याळ मौजूद छ्यायी।

Loading...

Leave a Reply

Your email address will not be published. Required fields are marked *