भड्डू की दाळ अर माळू पत्तळ मा फड़ भात छयूं रायी दिवोगी ग्रामोत्सव मा

यमकेश्वर प्रखण्ड दिवोगी ग्राम सभा राजस्व ग्राम क साईकिलवाड़ी, डंड-डांडी वासी प्रवासियूं न एक दिन ’अपर गॉव अपर सम्मेलन’ 02 जून 2019 कुणी उरये ग्यायी। ये सम्मेलन मा सब्बी वासी प्रवासियूं न बढ़ चढी कन भाग ल्यायी। ये अपर गॉव अपर सम्मेलन मा गौं की सब्बी ध्याणी (विवाहित बेटी) भी न्यूतीं छेयी। ये सम्मेलन मा दिल्ली, लुधियाना, रूद्रपुर, देहरादून अर होर शहरू बटी सब्बी प्रवासी परिवार लेकन अयां रैंन। ये एक दिन आयोजन दिवोगी युवा समिति न करी।


अपर गौं अपर सम्मेलन की मुख्य अतिथि डॉ मीरा रतूड़ी, जिला पंचायत सदस्य न ब्वाल कि यीन कार्यक्रम हर गौं मा कना की जरूरत च। आज ये कार्यक्रम से यन लगणू कि लोग भले भैर प्रवास कना छन लेकिन आज भी उ अपर जलड तै हर भर रखणा कुणी भरसक प्रयास कना छन। आज बरसूं बटी इन आयोजन हूणा जै मा हमरी पहाड़ संस्कृति की झलक पूर दिख्याणी। उन ब्वाल कि आज फड़ मा खाणा की ज्वा रस्याण यख मिलणी वैसे बड़ू आनन्द मिलणू। भड्डू की दाळ, अर माळू पत्तों मा भात खाण की अपर अलग ही स्वाद च। आज जख डिस्पोजल से पर्यावारण दूषित हूणा वखी माळू पत्तल पर्यावरण मित्र रूप मा सहयोगी च।


कार्यक्रम मा विशिष्ट अतिथि, आकाशवाणी देहरादून बिटी प्रोग्राम अधिकारी, विनय ध्यानी, आरोग्यधाम अस्पताळ, ऑनर डॉ विपुल कण्डवाल, बार ऐसोसियेशन देहरादून अध्यक्ष, मनमोहन कण्डवाल, गणेश कण्डवाल, जिला खाद्य सुरक्षा अधिकारी, देहरादून, गिरीश कण्डवाल, अर होर गणमान्य सदस्य भी उपस्थित छ्यायी। ये ग्रामोत्सव मा वासी प्रवासी लोगू न गॉव विकास पर भी चर्चा करी। मनमोहन सिंह नेगी अर शार्दुल सिंह रावत दगड़ी अनिल कण्डवाल न गॉव मा ही मतदाता पहचान पत्र बणाण पर जोर द्यायी। येक दगड़ी गौं क्षेत्र मा कुच्छ बेहतर काम कना खातिर दिवोगी युवा समिति गठन करे ग्यायी। शार्दुल रावत तै अध्यक्ष, सुखबीर सिंह बिष्ट तै सचिव, सुनील कण्डवाल तै उपाध्यक्ष, नरेन्द्र रावत तै सहसचिव अर हरीश कण्डवाल मनखी तै कोषाध्यक्ष चुने ग्यायी। येक दगड़ी सब्बी प्रवासियूं न हर साल इनी कार्यक्रम कन पर जोर द्यायी। पूर सम्मेलन मा भड्डू की दाल, अर माळू पत्ता मा फड़ मन कू भात काफी पंसद करे ग्यायी अर चर्चा कू विषय रायी।

Leave a Reply

Your email address will not be published. Required fields are marked *