किमसार प्राथमिक स्वास्थ्य केन्द्र तकन जोगियाणा सड़क डामरीकरण बाबत गौं रैवासियूं द्यायी ज्ञापन

डांडामण्डल क्षेत्र प्राथमिक स्वास्थ्य केन्द्र जू किमसार जोगियाणा गॉव बीच मा बण्यूं वख आणा एक मात्र लिंक रोड़ मल्ला बणास बिटी निकळी कन जोगयाणा गॉव बिटी अस्पताळ जै करदी। यीं सड़क खस्ताहाल छन, स्टाफ अर अन्य लोग सड़क रस्ता कम अर किमसार गॉव बिटी पैदल जाण ज्यादा ठीक समझे करदन, लेकिन समस्या उखम ऐ करदी जब क्वी सगत बीमार छ अर वै तै कंधा मा लेकन जाण पड़द। सड़क डामरीकरण बाबत जोगियाणा गौं रैवासियूं न जनप्रतिनिधियूं, खण्ड लोकनिर्माण विभाग दुगड्डा बाबत एक ज्ञापन भेजी।

जोगयाणा गौं रैवासी सतेन्द्र नेगी न बतै कि जब बिटी लॉकडाउन ह्वायी तब बिटी प्रवासी घर अयां छन, उन ये दौरान येक नै मुहीम छेड़ी जै मा उन गॉव की सड़क डामरीकरण अर मरम्मत कना बाबत जन प्रतिनिधियूं से अपील करी। उन बतै कि फिलहाल बरसात मा आणा जाणा बाबत ग्राम प्रधान मल्ला बणास बचन सिंह बिष्ट प्रयास से जेसीबी लगै कन रस्ता खुले ग्यायी, लेकिन यू क्वी स्थायी समाधान नी छ, बल्कि जब तकन येक डामरीकरण नी हूणा तब तकन हर बरसात मा या समस्या बणी रैली। ये बाबत जसपाल नेगी न ब्वाल कि या सड़क किमसार प्राथमिक स्वास्थ्य केन्द्र से जुड़ी सड़क छ, ये मा अस्पताल स्टाफ से लेकन दूर दराज क्षेत्र लोग इलाज बाबत ऐ करदन, लेकिन सड़क हालात खराब हूण से लोग किमसार बिटी पैदल जाणा कुणी मजबूर छन।

ये बाबत गौं रैवासियूं न खण्ड कार्यालय लोक निर्माण विभाग, दुगड्डा, जिला पंचायत, ब्लाक प्रमुख, क्षेत्रीय विधायक अर सांसद कुणी भी ज्ञापन भेजी। ज्ञापन दीण ह्वाळ मा सतेन्द्र नेगी, जसपाल नेगी, दीपक नेगी, अर अन्य ग्रामीण शामिल छ्यायी।

Leave a Reply

Your email address will not be published. Required fields are marked *