कब्बी पान बेचीकन करदू छ्यायी गुजारा, अतिक्रमण मा टूटी दुकान, सी आज बणी गे मेयर, जाणो पूर कहानी यखः…………

कब्बी कनी आल दिन, कैक दिन कब्ब फिर जावन यी सब्ब नियती हत्थ पन च। कू कब्ब कख पौंछी जाव यी बगत पर निर्भर करदू। लेकिन मनखी तै हिम्मत नी हरण चियांद एक दिन मेहनत जरूर अपण रंग दिखांद। यनी आज हम जिकर कना छवां निकाय चुनौ मा जित्या कुछ प्रत्याशियूं जौन सै सै मा करी कन पार्षद अर मेयर बणन क मुकाम हासिल करी। कब्बी पान बेची कन अपण गुजारा कन ह्वाळ भाजपा नेता अर मेयर बणी कन अर बड़ बड़ विरोधी नेतों तै बगछट लगैकन अर सब्यूं तै चौंकै द्यायी। हॉजी हम बात कना छवां कि देहरादून क नै मेयर सुनील उनियाल गामा की। जै नगर निगम न उंकी दुकान अतिक्रमण हटै कन उंते बेरोजगार करी दे छ्यायी, वै नगर निगम क आज उ मेयर कुर्सी पर बैठ गेन। साल 1989 मा जब नगर पालिका देहरादून क चुनाव ह्वेन त 27 साल क सुनील उनियाल गामा न फालतू लाईन वार्ड बटी बतौर निर्दलीय प्रत्याशी पार्षद पद पर चुनौ लड़ी, लेकिन नै छोळी हूण कारण कम अनुभव अर राजनीति अणपैट गळया जणी उंते चुनौ हरण पड़ी अर वै बगत उ चौथ नम्बर पर रैन। ये पार्षद चुनौ हरण बाद उन बिना तैयरी चुनौ नी लड़क की सौं खैन। वैक बाद उन सालों तकन भाजपा संगठन तै मजबूत करी। लोगू क बीच रैकन काम करी। तीन दशक बटी वा हार उंते भीतरी भीतरी राड़ा क सी काड़ तरा चुभणा रायी। जैक जिकर कब्बी कबार अपणू कछेड़ी मा करद छ्यायी, आखिर तीस साल बाद वीं टीस तै खत्म कन मा सफल रैन अर मेयर कुर्सी पर बैठीन।

Loading...

मूल रैवासी, ढुंगसिर थापली गौं, टिहरी गढवाल रैवासी सुनियाल उनियाल क परिवार कत्ती साखियूं पैल देहरादून मा ऐकन बसी गे छ्यायी। गामा क जलम भी दून मा ही ह्वायी। उंक पिता स्व0 सत्य प्रकाश उनियाल एक जण्या मण्या बामण अर ज्योतिषी अर मॉ प्रेमा देवी घरवासी छेयी। गॉधी इण्टर कॉलेज बटी पढी लेखी अर साल 1981 मा पान की दुकान खोली। कुच्छ बगत बाद उन नटराज सिनेमा हॉल क भैर खाण पीण सामान दुकान भी खोली, साल 2000 तकन उन या दुकान भी चलै। ये साल अतिक्रमण हटाण अभियान मा उंकी दुकान भी हटये ग्यायी। येक बाद गामा न करीब 15 साल तकन अलग अलग काम करीन, छुट मुट व्यापार दगड़ी ठेकेदरी भी करी, अपणू जीवन मा संघर्ष कन ह्वाळ गामा न ये बगत मा ही भाजपा संगठन मा जुड़ीन अर जुड़ी की रै गेन।

संगठन मा कत्ती पद पर रैकन उन पार्टी तै मजबूत कना काम करी। ये समर्पण की इनाम उंते पार्टी न मेयर पद क प्रत्याशी बणायी, जख उन पैल चुनौ मा शानदार सफलता हासिल करी। बुधवार दिन जब उंक मेयर बणन की औपचारिक घोषणा ह्वायी सुनील उनियाल गामा की घऽरवळी, शोभा उनियाल, बेटा शाश्वत, बेटी श्रेया अर होर भै बन्धु अर रिश्तादारू न खुशी मनायी। ये जीत खातिर उन पैल भगवान क आशीर्वाद बतै । उंकी घऽरवळी विधानसभा मा नौकरी करदी अर नौन एमटेक कनू बेटी अजों पढै कनी। गामा वनत त भाजपा संगठन दगड़ी पिछल कत्ती साल बिटी अपर पूर महत्वपूर्ण जिम्मेदरी निभाणा छन, लेकिन त्रिवेन्द्र रावत क अगुवै मा भाजपा सरकार बणन क बाद उ दुबर सक्रिय राजनीति मा आणा खातिर जुटी गेन। मुख्यमंत्री रावत नजीकी हूण अर संगठन मा पैठ नतीजा उं तै टिकट मिली अर आज देहरादून जनता उतै देहरादून क मेयर कुर्सी मा बैठयाळी।

Loading...

Leave a Reply

Your email address will not be published. Required fields are marked *