महाकाली -कवि सम्मेलन 2020 मा चली हास्य व्यंग्य बयार

“जै माँ कालिंका”
वुन त आजकल सोशियल मीडिया मा हर दुसरा दिन एक नै कवि सम्मेलन उर्येणु च पर जो कवि सम्मेलन परसि ऐत्वार 23 अगस्त खुणि दिनमा 12 बजी महाकाली कवि सम्मेलन 2020 का नौ से महाकाली का फेसबुक पेज बटि लाइव प्रसारित ह्वे वो अपड़ा आप मा एक अलग तरौ कु कार्यक्रम छौ ।

“महाकाली कवि सम्मेलन 2020” क नौ से “माँ कालिंका का पेज” पर एक भौत बिगरैलु औनलैन कवि सम्मेलन कु कार्यक्रम उर्येगे जैमा उत्तराखंड का सुप्रसिद्ध कव्यूँ ल काव्यपाठ करि ।

     कार्यक्रम मा कवि सम्मेलन क शुरुआत मा सुप्रसिद्ध ज्योतिषी आ.वीरेंद्र जुयाल उपिरि जी ल माँ भगवती कालिंका की स्तुति से कार्यक्रम की भलि सुंदर शुरुआत मंत्रोच्चारण से कार अर मंदिर क भौगोलिक परिस्थितियों से भि दर्शकों अर भक्तगणों तैं परिचित कराई ।
मूल रुप से गौं अर पोस्ट- फरसाड़ी, पट्टी-साबली पौड़ी गढ़वाल का रैवासी श्री वीरेंद्र जुयाल उपिरि जी ये कार्यक्रम मा मंच संचालन कु भि काम कना छा । मंच संचालन इतगा जबरदस्त छौ कि भौत लोग श्री उपिरि जी तै अभी तक भि बधै दीणा छन । जनि कवि सम्मेलन मा संचालन की जिम्मदरि उपिरि जी तै निभांद देखि त लैगे छौ कि अब कार्यक्रम मा दर्शकों तै बोर हूणा कु मौका नि मिलणु ।
कार्यक्रम मा शुरुआत मा नौली गौं, पौडी खाल टिहरी गढ़वाल बटि कवियित्री श्रीमती लक्ष्मी नौड़ियाल जी ल माँ सरस्वती जी वंदना से भौत शानदार प्रस्तुति दे । यांक अलावा श्रीमती लक्ष्मी नौडियाल जी ल *सगोर* अर *रैबार* द्वि सुंदर छंद बद्ध रचना सूणैं । वीरोंखाल बटि ममता रावत जी क *मांगल* प्रस्तुति भि भौत ही अच्छी रै ।
कार्यक्रम मा टिहरी गढ़वाल का भिलंगना घाटी रैबासी श्री वीर सिंह राणा जी ल “बगत भलु आलु” अर “ऐंसू ….खुलदारु घर ऐगे” जन समसामायिक भौत सुंदर रचना सूणै । पोखडा पौड़ी गढ़वाल बटि वरिष्ठ गढ़वाळी गजलकार श्री पयास पोखडा जी ल भि “कळ्यजिम तक खरोळि जा मीथै” अर “कनकै सुलझाण जिंदगी” जन गजल रचना सूणै कि दर्शकों तै भौत रोमांचित कार ।
अन्य कव्यूँ मा संगलाकोटी, पौड़ी गढ़वाल बटि श्री सुशील पुखर्याल जी ल कुछ छिटगा अर “बिगर बात तुम किलै गडगडा हुंयां” क प्रस्तुति से दर्शकों कु खूब मनोरंजन कार ।
महाकाली कवि सम्मेलन का ये कार्यक्रम का सुंदर संचालन कन वला युवा कवि श्री वीरेंद्र जुयाल उपिरि जी ल अपड़ कुशल व्यंग्य शैली अनुरूप “मिट्ठा लोभ जूठू खाण, सब्युं बसा बात नि” सूणैंकि दर्शकों तैं कुदगळि लगैं दीं ।
कार्यक्रम क आयोजन कन वला श्री दीपक रावत जी व श्री अनूप रावत जी कु तकनीकी पक्ष संभल्यूं छौ ।

ज्यादा जानकारी बाबत आप ये लिंक खोली सक्दो।

http://kalinkamandir.org

One thought on “महाकाली -कवि सम्मेलन 2020 मा चली हास्य व्यंग्य बयार

Leave a Reply

Your email address will not be published. Required fields are marked *