शराब कांडः सैकड़ाक लोगू तै मौत नींद सुलाण ह्वाळ बाप बेटा तै पुलिस न करी गिरप्तार, यूं की करतूत सूणी कन सब्बी रैं गेन दंग
उत्तराखण्ड क हरिद्वार अर उत्तर प्रदेश क सहारपुर जिला मा 100 से ज्यादा लोगू मौत की नींद सुलाण ह्वाळ शराब कांड तै लेकन पुलिस न एक बड़ू खुलासा करी। पुलिस मुताबिब जहरीली शराब सहारपुर बटी लैकन झबरेड़ा क्षेत्र मा गौं लोगू तै बीचे गे छेयी। पुलिस न सहारनपुर बटी शराब खरीदीकन यक ऐकन बीचण ह्वाळ बाप बेटा तै पकड़याल, जबकि शराब बणाण ह्वाळ मुख्य आरोपी अजों तकन लापता च।
बाप बेटा जू पकड़े गेन उ मा पुलिस न शराब क शराब खाली पाउच, कोल्ड ड्रिंक्स खाली बोतल बरामद करी। उनै हरद्वार पुलिस न इतवार कुणी जहरीली शराब से मन ह्वाळू लोगू संख्या 34 ह्वे ग्यायी। अजों तकन सिविल अस्पताळ रूड़की बटी करीब 90 लोगूं तै रेफर कर दिये ग्यायी। इतवार कुणी सिविल लाइन्स कोतवाली रूड़की मा हरद्वार एसएसपी जन्मेजय प्रभाकर खंडूडी अर सहारनुपर एसएसपी दिनेश कुमार न जहरीली शराब बणाण ह्वाळू कू भी खुलासा करी।
एसएसपी जन्मेजय प्रभाकर खंडूड़ी न बतै कि एसपी देहात नवनीत सिंह, सीओ मंगलौर डीएस रावत, अर सीओ देवबंद क नेतृत्व मा संयुक्त पुलिस टीम बणये ग्यायी। पुलिस टीम न मुखबिर बटी खबर जुटायी त बाप बेटा सोनू नौन फकीरा अर फकीरा, नौन लच्छीराम रैवासी गौं बाल्लूपुर थाना झबरेड़ा क कच्ची शराब मा संलिप्त हूण की जाणकारी मिली। इतवार दिन द्वी बाप बेटा तै भालस्वागाज तिराहा समणी पकड़ी लिये ग्यायी। द्वीयूं से पुलिस न पूछताछ मा बतै कि पॉच फरवरी रूमुक पड़द बगत पॉच बजे बाप बेटा सरदार हरदेव सिंह नौन सुखविंदर अर सुखविंदर नौन आशा सिंह रैवासी पुडेन थाना गागलहेड़ी सहारनपुर बटी 35 बोतल कच्ची शराब खरीद छेयी। येक बाद सोनू शराब लेकन घऽर आयी। ये बीच वैन शराब क रंग सफेद देखी कन हरदेव तै फोन करी कन पूछी कि ये रंग इन किलै च, अर दगड़ मा यन भी बतै कि ये मा डीजल गंध आणी। यन सुणी कन हरदेव न बतै कि वैन शराब मा कुच्छ रंग मिलै छ्यायी अर डीजल भांड पर शराब बणै छेयी, ये कारण वै पर डीजल गंद आणी अर रंग सफेद ह्वे ग्यायी। एसएसपी न बतै कि 70 रूप्या मा एक बोतल तकरीबन एक लीटी खरीदीकन 90 रूप्या मा अर एक पाउच 25 रूप्यों मा गॉव ह्वाळ तै बीचदू छ्यायी।
एसएसपी न बतै कि सोनू तै जब पता चली कि वै मनन शराब लेकन पीण अर बीचण ह्वाळ धीरा उर्फ धीरा सिंह, बिट्टू, चंद्रभान समेत होर लोगू मौत ह्वे ग्यायी त यन सुणी कन उ फरार ह्वे ग्यायी। येक बाद वैन ये बाबत हरदेव तै जाणकारी द्यायी। एसएसपी न यी भी बतै कि हरदेव सिंह क घऽर दबिश द्यायी त उ भी पैली लापता ह्वे ग्यायी। वै घऽर मा अर पुंगड़ मा कच्ची शराब की भट्टी मिली। एसएसपी न बतै कि सब्बी आरोपियूं खिलाफ हत्या समेत होर धाराओं मा केस दर्ज करयाल अर अर होर लापता आरोपियूं गिरप्तारी बाबत लगातार दबिश दीयाणी। वखी हरद्वार जिला मा जहरीली शराब से मरण ह्वाळू आंकड़ा इतवार कुणी 34 पौंछी ग्यायी। इतवार दिन द्वी होर लोगू दम तोड़ी द्यायी, एसएसपी जन्मेजय प्रभाकर खंड़ूड़ी न येकी पुष्टि करी।