एकेश्वर ब्लॉक मा स्कूलया नौन्याळ तै लाण ह्वाळी मैक्स गैरू भ्याळ मा पडन से एक बच्चा की मौत अर इथगा हुंया छन घैल

एकेश्वर ब्लॉक क नौगांवखाळ- मथाणा सड़क पर स्कूल्या नौन्याळूं से भरी मैक्स भ्याळ मा पड़न से एक बच्ची उखमी चित्त ह्वे ग्यायी अर ड्रेवर समेत 14 घैल ह्वे गेन। सब्बी घैल तै प्राथमिक उपचार बाद पौड़ी जिला अस्पताळ रेफर करे ग्यायी। सब्बी घैल बच्चों की उमर 03 से 17 साल की बीच च। राजस्व उपनिरीक्षक मनोहर नेगी न बतै कि शनिवार ब्यखन बगत नौंगावखाळ बटी स्कूल क बच्चों तै लेकन मथाणा गौं जाणी ह्वाळी मैक्स एकेश्वर ब्लॉक मुख्यालय पणखेत बटी करीब अद्धा किमी0 ऐथर गैरू भ्याळू मा पड़ी ग्यायी।
स्कूल मैक्स क हादसा की खबर मिलदी पूर क्षेत्र मा कोहराम मची ग्यायी। गाड़ी मा सरस्वती शिशु मंदिर नौंगावखाळ क 13 स्कूल्या नौन्याळ अर राजकीय इंटर कॉलेज नौगांवखाळ की एक छात्रा बैठी् छेयी। शनिवार कुणी ब्यखन बगत करीब साढे तीन बजे मैक्स अनियंत्रित ह्वेकन करीब 80 मीटर गैरू भ्याळ मा जैकन समायी। ये दुर्घटना मा राधिका (5) नौनी कुलदीप निवासी ग्राम मथाणा की मौके पर ही मौत ह्वे ग्यायी, जबकि सुनील की बेटी श्वेता (13) अर बेटा शुभम (11), अंशु (6) पुत्र नागेंद्र , मंदीप (11) पुत्र अज्ञात, नीलकंठ क बेटा आयुष (7) अर बेटी सिमरन (8), शिवांश (5) पुत्र दीपक, शालिनी (17) पुत्री सुनील सब्बी रैवासी ग्वाड़ मल्ला अर लक्की (7) पुत्र विनोद, एंजल (5) पुत्री अज्ञात, चालक रविंद्र (46) पुत्र अज्ञात, कशिश (7) पुत्री विक्रम, अमन (13) पुत्र ताजबर, अभिषेक (8) पुत्र अर्जुन सब्बी ग्राम मथाणा गंभीर रूप मा घैल ह्वे ग्यायी।
घैल तै प्राथमिक स्वास्थ्य केन्द्र नौगांवखाळ मा प्राथमिक उपचार क बाद पौड़ी जिला अस्पताळ कुणी रेफर कर दिये ग्यायी। क्षेत्रीय विधायक अर पर्यटन मंत्री सतपाल महाराज न यी घटना पर गहरा दुख जतै कन सीएमओ पौड़ी क घैल तै समुचित उपचार द्याण क निर्देश देन।

Leave a Reply

Your email address will not be published. Required fields are marked *