तालेश्वर धाम मा कैबिनेट मंत्री हरक सिंह रावत समणी उठी बीन नदी पुळ अर सड़क की मॉग

यमकेश्वर प्रखण्ड ताल घाटी मा पिछल एक हप्ता बटी शिव पुराण की कथा से पूर तालघाटी गुजांयमान छेयी। कथा वाचक व्यास अतुल कृष्ण देवरानी न लोगू तै शिव पुराण की कथा करी कन पूर तालघाटी तै शिवमय करी द्यायी। आज महाशिवरात्रि पर्व पर तालेश्वर महादेव मा प्रसाद रूप मा भण्डारा जिमी। ताल घाटी क्षेत्र मा उत्तराखण्ड सरकार कैबिनेट मंत्री (वन, पर्यावरण, अर श्रम मंत्री) हरक सिंह रावत भी ये पावन अवसर पर मौजूद रैन। आज कार्यक्रम प्रमुख अतिथि डॉ हरक सिंह रावत छ्यायी। डॉ हरक सिंह रावत जब ताल घाटी मा पौंछीन त उ शिवभक्त जनता तै धाद लगै कन ब्वाल कि क्षेत्र मा पैल बार आणा मौका मिली, सैद तालेश्वर महादेव की यही इच्छा रै ह्वेली। वखी उन ब्वाल कि ये क्षेत्र मा आण मा मि तै सूकून मीली। लेकिन क्षेत्र मा सड़क हालात बौत खराब च। जनता न उ कुणी ब्वाल कि जब आप विधानसभा क्षेत्र मा चिल्लरखाल जंगलात विभाग से सड़क बणवे द्यायी त यमकेश्वर आधारभूत पिछल 70 साल बटी अटग्यूं बीन नदी पुळ बणाण की मॉग जनता न करी। वखी बीन नदी बटी विंदावसनी तकन फ्लाईओवर बणये जाव, अर सड़क स्थायी समाधान की मॉग करी। वखी क्षेत्रीय जनता न काण्डाखाल खैराणा मोटर माग तै धारकोट जुलेड़ी सड़क से साईकिलवाड़ी मा जुड़े जाव।
आज कार्यक्रम मा शैलेन्द्र रावत पूर्व विधायक कोटद्वार भी ये भण्डारा मा ऐन अर उन भी यख पर्यटन की अपार संभावना बतायी। सहकारी बैक समिति नव निर्वाचित क्षेत्रीय रैवासी महावीर प्रसाद कुकरेती ब्वाल कि मी सरकार तरफ बटी प्रयास कना छौ कि जल्द से ताल घाटी मा झील बणये जाव, अर सब्ब मंदिरू तै पर्यटन से जुड़े जाव ताकि क्षेत्रीय लोगू तै स्वरोजगार मिली सको। वखी बीजेपी नव युवा नेत्री आरती गौड़ न ब्वाल कि क्षेत्र की भौगोलिक परिस्थति पर्यटन कुणी बौत सुन्दर च लेकिन सड़क अभाव मा क्षेत्र पैथर रै ग्यायी।  
कार्यक्रम क सफल संचालन सतपाल रावत न करी। मेला मा सब्बी क्षेत्रीय जनता बढ चढी कन भाग ल्यायी।

Loading...

Leave a Reply

Your email address will not be published. Required fields are marked *